പ്രകൃതി ഒളിപ്പിച്ചുവെച്ചിരിക്കുന്ന വിസ്മയങ്ങള്‍ തേടി കാട് കയറുന്നവര്‍ നിരവധിയുണ്ട്. വെള്ളച്ചാട്ടവും ട്രക്കിംഗും ചങ്കിടിപ്പായി കൊണ്ടുനടക്കുന്നവരും ഏറെയാണ്. എന്നാല്‍, ഏത് തരം സഞ്ചാരികളെയും ഒരുപോലെ ആകര്‍ഷിക്കുന്ന സ്ഥലങ്ങള്‍ കുറവാണ്. ഇക്കൂട്ടത്തില്‍ കണ്ണുംപൂട്ടി അടിപൊളി എന്ന് പറയാന്‍ കഴിയുന്ന ഒരിടം തിരുവനന്തപുരത്തുണ്ട്.
ഇടതൂര്‍ന്ന് നില്‍ക്കുന്ന കാടും ഒരു വെള്ളച്ചാട്ടവും പിന്നെ പ്രകൃതി മനോഹരമായ കുറേ കാഴ്ചകളും ഒക്കെയായി കല്ലാര്‍ അണിഞ്ഞൊരുങ്ങി നില്‍ക്കുകയാണ്. ഇടുക്കിയിലും കോട്ടയത്തും ഇതേ പേരില്‍ സ്ഥലങ്ങളുണ്ട്. ഇവിടങ്ങളെല്ലാം ഒരുപോലെ മനോഹരവുമാണ്. എന്നാല്‍, തിരുവനന്തപുരത്ത് അറിഞ്ഞതും അറിയാത്തതുമായ ഇടങ്ങള്‍ ഏറെയുണ്ടെങ്കിലും മനോഹര കാഴ്ചകളുള്ള കല്ലാര്‍ തീര്‍ച്ചയായും കണ്ടിരിക്കേണ്ടതു തന്നെയാണ്. തിരുവനന്തപുരം യാത്രയില്‍, പ്രത്യേകിച്ച് പൊന്മുടി യാത്രയില്‍ ഒരിക്കലും ഒഴിവാക്കരുതാത്ത കല്ലാറിന്റെ ഭംഗി വര്‍ണനാതീതമാണ്. പൊന്മുടിയിലേക്കുള്ള പാതയിലാണ് കല്ലാര്‍ സ്ഥിതി ചെയ്യന്നത്.
ഒരു തവണ പോയാല്‍ വീണ്ടും പോകാന്‍ തോന്നിപ്പിക്കുന്ന കല്ലാറിനെ തേടി ഇന്ന് നിരവധി സഞ്ചാരികളാണ് എത്തുന്നത്. കുടുംബത്തോടൊപ്പവും സുഹൃത്തുക്കളോടൊപ്പവും സന്ദര്‍ശിക്കാന്‍ അനുയോജ്യമായ ഇടമാണിത്. കല്ലും ആറും ഒരുപോലെ ചേര്‍ന്ന സ്ഥലമാണ് കല്ലാര്‍. ഈ പ്രദേശത്ത് കൂടിയൊഴുകുന്ന കല്ലാര്‍ നദിയില്‍ നിന്നുമാണ് നാടിനും അതേ പേര് തന്നെ ലഭിച്ചതെന്ന് പറയപ്പെടുന്നു. കല്ലാറിലെത്തിയാല്‍ മനസില്‍ ഈ പേരല്ലാതെ മറ്റൊരു പേരും വരില്ലെന്നതാണ് യാഥാര്‍ത്ഥ്യം. പാറക്കല്ലുകളും ഉരുളന്‍ കല്ലുകളുമെല്ലാം ഇവിടെ ധാരാളമായി കാണാം.
ട്രക്കിംഗോ പക്ഷിനിരീക്ഷണമോ വെറുതെയുള്ള കറക്കമോ അങ്ങനെ ഏതുമാകട്ടെ കല്ലാര്‍ എല്ലാത്തരം സഞ്ചാരികളെയും തൃപ്തിപ്പെടുത്തും. പ്രകൃതിയെ ഏറ്റവുമടുത്ത് അറിയാന്‍ കഴിയുമെന്നതാണ് കല്ലാറിന്റെ സവിശേഷത. അതിനാല്‍ തന്നെ പ്രകൃതി സ്‌നേഹികള്‍ക്ക് ഏറ്റവും അനുയോജ്യമായ സ്ഥലമാണിത്. യാത്ര ചെയ്യാനും കല്ലാര്‍ കാണാനുമായി ഇറങ്ങിയതാണെങ്കില്‍ ഒരു ദിവസം കൊണ്ട് സമയമെടുത്ത് കണ്ടു തീര്‍ക്കാവുന്ന കാഴ്ചകളാണ് ഇവിടെയുള്ളത്. ശാന്തതയും നിശബ്ദതയും ചൂട് കുറഞ്ഞ കാലാവസ്ഥയുമാണ് കല്ലാറിന്റെ മറ്റൊരു സവിശേഷത.
പൊന്മുടിയിലേയ്ക്കുള്ള വഴിയിലാണ് കല്ലാര്‍ സഞ്ചാരികളെ കാത്ത് നില്‍ക്കുന്നത്. ഏകദേശം 500 മീറ്ററോളം ദൂരം വാഹനത്തില്‍ പോകാം. പാര്‍ക്കിംഗിന് അനുവദിച്ച മേഖലയില്‍ വാഹനം നിര്‍ത്തിയാല്‍ ഇവിടെ നിന്ന് ഏകദേശം രണ്ട് കിലോ മീറ്ററോളം ദൂരം കാല്‍നടയായി സഞ്ചരിച്ചാല്‍ മീന്‍മുട്ടി വെള്ളച്ചാട്ടത്തിലെത്താം. കാടിന് നടുവിലൂടെ പോകുമ്പോള്‍ ഒരു ഭാഗത്ത് അരുവിയുടെ ശബ്ദം കേള്‍ക്കാം. കാടിനുള്ളിലെ വെള്ളച്ചാട്ടത്തിന്റെ കാഴ്ച മാത്രമല്ല, വനത്തിലൂടെ നടന്നുള്ള യാത്രയും മീന്‍മുട്ടി ട്രക്കിംഗിന്റെ ആകര്‍ഷണങ്ങളാണ്.
മീന്‍മുട്ടി വെള്ളച്ചാട്ടത്തിലേയ്ക്കുള്ള യാത്രയില്‍ ഒരോ 100-150 മീറ്ററിനിടയിലും ഒരു ഗൈഡിനെ കാണാം. പരിചിതമല്ലാത്ത മേഖലകളില്‍ ആരെങ്കിലും കുളിക്കാനിറങ്ങുന്നുണ്ടോ എന്ന് നിരീക്ഷിക്കുകയും സുരക്ഷിതമായ മേഖലയില്‍ അവര്‍ക്ക് പ്രകൃതിയെ ആസ്വദിക്കാനുള്ള സൗകര്യമൊരുക്കുകയുമാണ് ഇവരുടെ ജോലി. ഈ പോയിന്റുകളിലെല്ലാം മീന്‍മുട്ടി വെള്ളച്ചാട്ടത്തിലേയ്ക്കുള്ള ദൂരം കൃത്യമായി രേഖപ്പെടുത്തിയിട്ടുണ്ട്. വഴിയോരങ്ങളില്‍ വിശ്രമിക്കാനായി പ്രത്യേകം തയ്യാറാക്കിയ ഇരിപ്പിടങ്ങളുമുണ്ട്. കാടിന് നടുവിലൂടെയുള്ള യാത്രയായതിനാല്‍ തന്നെ വെയിലേറ്റ് വാടുമെന്ന പേടി വേണ്ട.
മീന്‍മുട്ടിയിലെത്തുമ്പോള്‍ നീരൊഴുക്കുള്ളതിനാല്‍ വനംവകുപ്പ് അധികൃതരുടെയും ഗൈഡിന്റെയും നിര്‍ദ്ദേശങ്ങള്‍ അനുസരിക്കണം. കല്ലാര്‍ മീന്‍മുട്ടി വെള്ളച്ചാട്ടം എന്നുമിതിനു പേരുണ്ട്. അധികം ചൂടുമില്ല, അധികം തണുപ്പുമില്ലാത്ത, വര്‍ഷം മുഴുവന്‍ നീണ്ടു നില്‍ക്കുന്ന പ്രസന്നമായ കാലാവസ്ഥ. അതുകൊണ്ടുതന്നെ എപ്പോള്‍ വേണമെങ്കിലും ധൈര്യമായി കല്ലാറിലേയ്ക്ക് ടിക്കറ്റെടുക്കാം. എങ്കിലും സെപ്റ്റംബര്‍ മുതല്‍ മാര്‍ച്ച് അവസാനം വരെയുള്ള സമയമാണ് ഇവിടം സന്ദര്‍ശിക്കുവാന്‍ യോജിച്ചത്.
പൊന്മുടിയ്ക്ക് സമാനമായി രാവിലെ 8 മണി മുതല്‍ വൈകുന്നേരം 4 മണി വരെയാണ് കല്ലാറിലേയ്ക്ക് പ്രവേശനം അനുവദിച്ചിരിക്കുന്നത്. മുന്‍കൂട്ടിയുള്ള ബുക്കിംഗ് ആവശ്യമില്ല. ഒരാൾക്ക് ടിക്കറ്റ് ചാർജ് 40 രൂപയാണ് , ടുവീലറിന് 20 രൂപയും, ഫോർവീലറിന് 40 രൂപയുമാണ് പാർക്കിങ് നിരക്ക് , വന്യജീവികളുടെ സാന്നിധ്യമുള്ളതിനാല്‍ വൈകുന്നേരം അഞ്ചരയോട് കൂടി കല്ലാര്‍ ടൂറിസം കേന്ദ്രം അടയ്ക്കും.
